रक्षामन्त्रीको खानपानबारे कटवालको निर्देशन
मनोज अधिकारी, पोखरा जेठ २३- रक्षामन्त्री विद्या भण्डारी गत बिहीबार पोखरा आउँदा प्रधानसेनापति रुक्मांगत कटवालले चासो दिँदै प्रबन्धका लागि पश्चिम पृतनालाई विशेष निर्देशन दिएका थिए। 'रक्षामन्त्रीको ब्रेकफास्टका लागि मेनु सहितको निर्देशन थियो'- पश्चिम पृतना स्रोतले भन्यो।
खानपानमा विशेष ख्याल दिन र सवारीमा आफैं खटिएर उच्चप्रबन्ध मिलाउन पृतनापति शिवराम प्रधानलाई निर्देशन दिएको स्रोतले बतायो। रक्षामन्त्रीको स्वागत सत्कार र ब्रेकफास्टका लागि चिफसापबाट मेनुअसहितको विशेष निर्देशन आएको थियो' सैनिक स्रोतले भन्यो-'मन्त्रीको सवारीमा समेत आफैं सहभागी हुन पृतनापतिलाई अह्राइएको थियो।'
रक्षामन्त्री भण्डारी एक महायज्ञको समापनका लागि बिहीबार पोखरा आएकी थिइन्। कान्छी छोरी उषाकिरणका साथ सैनिक हेलिकप्टरमा आएकी उनी सिधै पश्चिम पृतना उत्रेकी थिइन्। त्यहाँ उनको कुनै कार्यक्रम नरहे पनि पोखरा आएको मौका पारेर सम्मानसहित ब्रेक फास्ट लिने योजना थियो। यसअघिका रक्षामन्त्री पोखरा आउँदा पृतनामा जाने र 'ब्रेक फास्ट' लिने चलन थिएन।
स्रोतकाअनुसार पृतनापतिले सेनापतिको निर्देशन बेवास्ता गर्दै रक्षामन्त्रीलाई 'नर्मल ट्रिट' गरेका थिए। मन्त्रीको सवारीमा पनि आफू नगई गणपतिलाई खटाए।
रक्षामन्त्री भण्डारीको स्वागत सत्कार र खानपानमा विशेष ध्यान दिन प्रधानसेनापतिले दिएको निर्देशनलाई पृतनापतिले उचित नमानेको स्रोतले बतायो ।
'चिफ सापको निर्देशन आवश्यकभन्दा बढी र केही अस्वभाविक लागेर होला'- पृतना स्रोतले भन्यो-'रक्षामन्त्रीलाई 'नर्मल ट्रिट भयो।'
रक्षामन्त्रीको सेवाका लागि सेनापतिबाट पृतनालाई दिईएको निर्देशन 'बेग्लै र विशेष चासो'युक्त रहेको विषयले अहिले सेनाभित्र चर्चा पाएको छ।
सेनापतिबाट पृतनापतिलाई फोन गरेर रक्षामन्त्री र उनकी छोरीलाई के-के खुवाउनु भन्ने 'मेनुसहितको निर्देशन दिएपछि पृतना कस्तो 'ट्रिट' गर्ने भन्ने अन्यौल छाएको थियो।
'निर्देशन स्वभाविक र आवश्यक नलागेपछि त्यसलाई बेवास्ता गर्ने मनसाय बनेकॊ हो' पश्चिम पृतनाका एक सैनिक अधिकारीले भने।
उनकाअनुसार सेनापतिको निर्देशनमा रक्षामन्त्रीलाई खुवाउनुपर्ने खानासहितको 'मेनु'समेत थियो। कटवालले मन्त्री भण्डारी 'भेजिटेरियन' भएको भन्दै आमा-छोरीलाई जेरी पुरी हलुवा खुवाउन 'मेनुसहित निर्देशन जारी गरेका थिए। तर भण्डारीले ब्रेक फास्टका बेला आफू 'भेजिटेरियन' नभएको बताएकी थिइन्। पृतनाले उनका लागि चिया ब्रेड र तरकारीको ब्रेक फास्ट तयार गरेको थियो।
'सेनापतिबाट रक्षामन्त्रीलाई गर्ने सेवाको यस्तो निर्देशन कहिलै आउने गरेको थिएनु ती सैनिक अधिकारीले भने-'यसपटक आश्चर्य भयो । चिफसापबाट के खुवाउनु के नखुवाउनु भन्ने समेत निर्देशन आयो।'
माओवादी नेतृत्वको सरकार बनेदेखिनै सरकार र सेनाबीचको सम्बन्ध चिसो हुँदै थियो। दुवैले एकअर्कालाई अटेर गर्ने र मान्यता नदिने होडले पछिल्लो समय राष्ट्रिय बहसको रुप मात्र लिएन सेनापति बर्खास्त प्रकरणकै कारण एक महिनाअघि माओवादी नेतृत्वको सरकार ढलेको थियो।
आफूलाई प्रतिशोधका आधारमा बर्खास्त गर्ने सरकार ढलेपछि बनेको नयाँ सरकारका नयाँ रक्षामन्त्री प्रति सेनापति सुरुवातमै नरम देखिएको विश्लेषण गरिएको छ। यसअघिका रक्षामन्त्री रामबहादुर थापा सार्वजनिक कार्यक्रममा पोखरा आउँदा सैनिक मुख्यालयले उक्त कार्यक्रममा नजान पृतनापतिलाई रोक लगाउँदै आएको स्रोतको दावी छ।
'यसअघिका रक्षामन्त्री आउँदा त्यस्तो कार्यक्रममा नजानु भन्ने आदेश आउँथ्यो'- स्रोतले भन्यो- 'यसपटक स्पेशल टेक केयर गर्नु भन्ने आदेश आउँदा आश्चर्य लाग्नु स्वभावित बन्यो।'
रक्षामन्त्री भण्डारीले राष्ट्रिय मुद्दा नपरेको र छोटो दुरीको यात्राका लागि पनि महंगो खर्च गरेर सैनिक हेलिकप्टर प्रयोग गरेको पनि सेनाभित्र चर्चा पाएको छ। छोरी एकजना नीजि सुरक्षागार्ड र राप्रपाका सभासद् सूर्यबहादुर केसीसँगै सैनिक हेलिकप्टरमा पृतना झरेकी रक्षामन्त्री ब्रेक फास्ट पछि सेनाले उपलब्ध गराएको सुरक्षादस्ता सहित पोखरा नयाँबजारस्थित एमाले पार्टी कार्यालय र त्यसपछि महायज्ञको समापनमा सहभागी भएकी थिइन्। महायज्ञमा केहीबेर बसेर उनी पुनः हेलिकप्टरमै राजधानी फर्केकी थिइन्।
स्रोतकाअनुसार कामको आवश्यकता नभए पनि रक्षामन्त्रीलाई खुशी पार्न हेडक्वाटरबाटै हेलिकप्टर उपलब्ध गराईएको थियो। रक्षामन्त्रीलाई आधाघण्टाको हवाई यात्रामा पुगिने पोखरा आउजाउ गर्न हेलिकप्टर प्रयोग गर्दा एक लाखभन्दा बढी खर्च भएको सैनिक स्रोतको भनाई छ।
source:
http://www.nagariknews.com/news-highlights/139-highlights/1701-2009-06-06-12-58-49.html
No comments:
Post a Comment