राष्ट्रपतिको चियापान माओवादीद्वारा बहिस्कार
बलराम पाण्डे/ काठमाडौं
नेपालमा गणतन्त्र घोषणा भएको पहिलो वार्षिकोत्सवका अवसरमा गणतन्त्र नेपालका नेपालका प्रथम राष्ट्रपति डा. रामवरण यादवले चियापान समारोहको आयोजना गरे । राष्ट्रपति निवास शितल निवासमा आयोजित चियापान समारोहमा सबै दलका नेताहरुको सहभागिता रहे पनि माओवादी भने अनुपस्थित रह्यो ।
यसअघि सरकारले आव्हान गरेको विशेष कार्यक्रममा पनि माओवादी अनुपस्थित थियो । विशेष कार्यक्रम र चियापान समारोह माओवादीले बहिस्कार गरेको थियो ।
माओवादी नेतृत्वमा रहेको सरकारले प्रधानसेनापति रुक्माङ्गद कटवाललाई हटाए पनि राष्ट्रपतिले काममा र्फकन निर्देशन दिएपछि माओवादी नेतृत्वको सरकारले राजीनामा दिएको थियो ।
माओवादीले भने गणतन्त्र दिवस पार्टीका तर्फबाट छुट्टै मनाएको छ । चियापान समारोहमा राष्ट्रपतिले पदमा रहन निर्देशन दिएका प्रधानसेनापति रुक्माङ्गद् कटवाल, रथि छत्रमान गुरुङको सहभागिता रहेको थियो भने माओवादी नेतृत्वको सरकारले कामु प्रधानसेनापति तोकेका कुलबहादुर खड्का भने सहभागी थिएनन् ।
उपराष्ट्रपति परमानन्द झा, प्रधानमन्त्री माधवकुमार नेपाल, मन्त्रीहरु, सचिवहरु, विदेशी कुटनीतिक नियोगका अधिकारी लगाएतको सहभागिता रहेको थियो ।
राष्ट्रपतिमा पराजय भोगेका रामराजाप्रसाद सिंहसमेत आफन्तको सहारामा लौरो टेकेर राष्ट्रपतिले आयोजना गरेको चियापान समारोहमा सहभागी भएका थिए । माओवादी समर्थनमा नै उनी राष्ट्रपतिको उम्मेदबार बनेका थिए । चियापानमा समारोह सुरु हुनुभन्दा केही समय पहिले नै पुगेका प्रधानसेनापति कटलाललाई चियापानमा सहभागी अधिकांश दलका नेताहरुले बधाई दिएका थिए ।
एमाले नेतृत्वको वर्तमान सरकारले अघिल्लो सरकारले गरेको कारवाही फुकुवा गरी प्रधानसेनापतिमा कटवालनै रहेको निर्णय गरेपछि कटवाल सबैका बधाईका पात्र बनेका थिए ।
अर्का रथि गुरुङलाई पनि चियापानमा उपस्थित अधिकांशले अगि्रम शुभकामना दिएका थिए । प्रधानसेनापति कटवालको कार्यकालपछि प्रधानसेनापति पदको दावेदारका रुपमा रहेका गुरुङलाई पनि अग्रिम शुभकामना दिइएको हो ।
चियापान समारोहमा माओवादी बाहेकका सबै दलका प्रतिनिधिको सहभागिता थियो ।
चियापान समारोहमा उपस्थित पाहुनालाई राष्ट्रपति र प्रधानमन्त्रीले निकै खुशी मुद्रामा स्वागत गरेका थिए ।
चियापान समारोहमा उपस्थित पूर्व प्रधानमन्त्री एवं काग्रेस वरिष्ठ नेता शेरबहादुर देउवाले शान्ति प्रकृया र नया संविधान निर्माण सवैको प्राथमिकतामा रहेको बताए ।
उनले सहमति सहकार्य र सहमतिलाई सबैले पालना गर्नुपर्ने उल्लेख गर्दै संविधान अनुरुप एक वर्षमा उल्लेख्य परिवर्तन भएको जनाए ।
अर्थमन्त्री सुरेन्द्र पाण्डेले वितेको एक वर्षमा जनताले अपेक्षा गरेअनुसार परिवर्तन नभएको बताए । उनले अर्को वर्षसम्म जनताले सोचेका उपलब्धिहरु पूरा हुने बताए ।
No comments:
Post a Comment