मिर्जालाई मार्ने गिरोहले नै जमिमलाई मारेको पुष्टि

16/02/2010 06:39:00मनोज घर्तीमगर

Font size:

बब्लु श्रीवास्तवले भारतको बरेली जेलमै योजना बनाए, भरत नेपालीसँगको सल्लाहमा अन्तिम निर्णय भयो
श्रीवास्तवले दीपक शाही उर्फ बब्बुलाई मुख्य रणनीतिकार नियुक्त गरे, बब्बु कात्तिकमै नेपाल र माघमा काठमाडौं आए
बब्बुले काठमाडौंमा सई प्रकाश क्षेत्रीलगायत १३ जनाको सहयोगमा जमिम हत्याको रणनीति बनाए
उनीहरुबीच काठमाडौंका विभिन्न ठाउँमा पटक-पटक बैठक भए, गोली हान्ने जिम्मा दुईजनालाई दिइयो
हत्यालगत्तै दुवैजना सुटरसहित सबै रणनीतिकार लैनचौरमा भेला भए, फरक-फरक मोटरसाइकलमा दुईजना सुटरलाई पालैपालो कलंकी पुर्‍याइयो, हत्यामा प्रयोग भएको मोटरसाइकल सहयोगीले फुटुङ पुर्‍याए

नयाँ पत्रिका
काठमाडौं, ३ फागुन

११ वर्षअघि पूर्वमन्त्री तथा तत्कालीन सांसद मिर्जा दिलसाद बेगको हत्या गर्ने अन्डरवल्र्ड गिरोहले नै मिडिया उद्यमी जमिम शाहको हत्या गरेको पुष्टि भएको छ । मिर्जालाई मार्ने बब्लु श्रीवास्तवको निर्देशनमा नेपाली अपराधीसमेत मिलेर जमिमको हत्या गराएको प्रहरीको दाबी छ ।

हत्या र अपहरणका करिब ४० वटा मुद्दाका अभियुक्त बब्लु श्रीवास्तव अहिले भारत उत्तरप्रदेशको बरेली जेलमा छन् । सन् १९९५ मा सिंगापुरमा पक्राउ परी भारत सुपुर्द गरिएका श्रीवास्तवले जेलबाटै आपराधिक सञ्जालको नेतृत्व गरिरहेका छन् । उनकै निर्देशनमा सन् १९९९ मा मिर्जाको हत्या भएको थियो ।

भारतविरोधी गतिविधि गर्नेलाई मार्ने भन्दै उनले नेपाली मुस्लिम समुदायका उद्यमी युनुश अन्सारीलाई निशाना बनाएका थिए । तर, युनुश जेल परेपछि श्रीवास्तवको गिरोहले जमिमलाई मार्ने योजना बनाएको थियो । श्रीवास्तवका सहयोगीले काठमाडौंमा महिना दिन लामो योजना बनाएर २४ माघ अपराह्न २:३० मा लाजिम्पाटमा जमिमको हत्या गरेका थिए ।

बब्लु श्रीवास्तवका 'पार्टनर' भरत नेपालीले नेपाल प्रहरीका एक सई र अन्य नेपालीको सहयोगमा जमिमको हत्या गरेको प्रहरी अनुसन्धानबाट खुलेको छ । प्रहरीका अनुसार हत्यामा १४ जनाको प्रत्यक्ष संलग्नता थियो । तीमध्ये १२ जना नेपाली र दुईजना भारतीय हुन् ।

हत्या भएको भोलिपल्टै माघ २५ गते बिहान ११:५५ मा जमिम शाहकै स्पेसटाइम केबुलमा फोन गरेर भरत नेपालीले हत्याको जिम्मेवारी लिएका थिए ।
महानगरीय प्रहरी अपराध अनुसन्धान महाशाखा हनुमानढोकाले सोमबार पत्रकार सम्मेलन गरेर प्रहरीले भरत नेपालीकै समूहले जमिमको हत्या गरेको सार्वजनिक गरेको छ । महानगरीय प्रहरी आयुक्त एआइजी मदन खड्काले हत्याको रणनीतिक योजनाकार भने बब्बु भन्ने दीपक शाही रहेको जानकारी दिए ।

तर, आरोपीमध्ये नेपाल प्रहरीका सई प्रकाश क्षेत्रीबाहेक सबै फरार छन् । क्षेत्रीलाई भने प्रहरीले हिरासतमा राखी अनुसन्धान गरिरहेको छ । 'हत्याका अन्य अभियुक्त सबै फरार छन्,' एआइजी खड्काले भने, 'सई क्षेत्रीले अभियुक्तहरूलाई भगाउन सहयोग गरेको पुष्टि भएको छ, अब अन्य अभियुक्त पनि छिट्टै पक्राउ पर्छन् ।'

बब्लु श्रीवास्तव र भरत नेपालीको निर्देशन पाएपछि बब्बुले नेपालमा रहेका विभिन्न आपराधिक गिरोहका सदस्यलाई भेटेर हत्याको सम्पूर्ण योजना बनाएका थिए । बब्बुसँग नेपाल र भारतको दोहोरो नागरिकता रहेको प्रहरीको भनाइ छ, तर कुन जिल्लाको नागरिकता छ भन्ने अहिलेसम्म खुलेको छैन ।

जमिमको हत्या गर्न मोटरसाइकलमा आउनेमध्ये एकजना भारतीय नागरिक मोहम्मद बकार सैयद भएको प्रहरीको भनाइ छ । अनुसन्धानका क्रममा सुटर नं. २ मानिएका मोहम्मद सैयदले १० पुसमा सौखात बेगलाई बुटवलमा गोली हानी हत्या गरेका थिए । उनी भारतीय नागरिक हुन् । मोटरसाइकलमा आएका सुटर नं. १ को नाम खुल्न सकेको छैन ।

हत्यामा काउले- १ नुवाकोटनिवासी श्रीकृष्ण पौडेल, रविन भन्ने गुड्डु सिंह, दादु, राजु लामा, किशोर खड्का, सई प्रकाश क्षेत्रीको प्रत्यक्ष सहभागिता रहेको महानगरीय प्रहरी परिसर हनुमानढोकाका एसपी गणेश केसीले जानकारी दिए । अर्का एकको नाम खुलेको छैन ।

एसपी केसीका अनुसार बानेश्वरमा एभरेस्ट कम्युनिकेसन सेन्टर चलाएर बसेका रोशनकुमार पाण्डे, सिद्धि अटोवक्र्सका धनी वीरेन्द्र मण्डल, केशर भनिने अर्का एकजना पनि हत्याराको सम्पर्कमा थिए । तर, उनीहरूलाई हत्या-योजनाको सम्बन्धमा जानकारी नभएको प्रहरी भनाइ छ ।

कहाँ बन्यो हत्याको योजना ?
११ वर्षअघि १५ असार ०५५ मा पूर्वमन्त्री तथा तत्कालीन सांसद मिर्जा दिलसाद बेगलाई मार्ने गिरोहले उस्तै शैलीमा जमिमको हत्या गरेको छ । मिर्जाको हत्या गर्नेहरू पूर्वप्रहरीमहानिरीक्षक हेमबहादुर सिंहको घरमा बसेझै जमिमको हत्या गर्नेहरू सशस्त्र प्रहरीका पूर्वडिआइजी ज्ञानेन्द्र राईको घरमा बसेको तथ्य खुलेको छ ।

जमिमका हत्याराले बानेश्वर शान्तिनगरमा सशस्त्र प्रहरीका पूर्वडिआइजी ज्ञानेन्द्र राईको घर, श्रीकृष्ण पौडेलको कार्गो अफिस, श्रीकृष्णकै म्हैपीमा रहेको भाडाको कोठा, बागबजारको संगम गेस्टहाउस र गोंगबुमा राजु लामाको सहयोगमा भाडामा लिइएको सविता श्रेष्ठको घरमा पटक-पटक बैठक बसेर हत्याको योजना बनाएका थिए ।

'यी घरहरूमा बसेर अभियुक्तले हत्याको योजना बनाएका थिए,' एसएसपी रणबहादुर चन्द भन्छन्, 'हत्याको योजना बन्दै गर्दा सई प्रकाश क्षेत्रीले पनि प्रलोभनमा परेर प्रहरीको सुरक्षा-रणनीतिबारे जानकारी दिएका थिए ।'

श्रीकृष्णले हतियार सुरक्षित राख्ने, घर व्यवस्थापन गर्ने, बब्बुलाई आश्रय दिने काम गरेको अनुसन्धानले देखाएको छ । त्यस्तै, सई प्रकाश क्षेत्री काठमाडौंको सम्पूर्ण सुरक्षा-व्यवस्थाका बारेमा जानकारी दिएर हत्या गर्न सहयोग गरेका थिए । उनले सुरक्षा अवस्थाको बारेमा दिएको जानकारीका आधारमा जमिमको लाजिम्पाटमा हत्या भएको हो । क्षेत्रीले जमिमको हत्या गर्न बनाइँदै गरेको योजनालाई पूर्ण रूपमा सहयोग गरेका थिए ।

मुख्य रणनीतिकार नेपाल आए
बब्लु श्रीवास्तवले जमिमको हत्या गर्ने योजना बनाएपछि रणनीतिकारका रूपमा बब्बु भन्ने दीपक शाहीलाई छनोट गरे । बब्बु नेपाल आएर सई प्रकाश क्षेत्रीको सम्पर्कमा गए । करिब चार/पाँच वर्षअघि प्रकाशको फुपूको छोराको बिहेमा भारत जन्ती गएको वेला दुवैको चिनजान भएको थियो । उनीहरूबीच वेलावेलामा सम्पर्क हुने गरेको प्रहरी अनुसन्धानबाट खुलेको छ ।

जमिम हत्याका मुख्य रणनीतिकार बब्बु कात्तिक १५ गते नेपाल आएका हुन् । त्यसबीच उनी कहाँ बसे भन्ने खुलेको छैन, उनी काठमाडौं भने माघको पहिलो साता नै आएको प्रहरी भनाइ छ ।
अनुसन्धान अधिकृतका अनुसार बब्बु तीनजना सहयोगीका साथ काठमाडौं आएका हुन् । त्यसपछि समूहमा सदस्य थपिँदै गए । उनीहरूमध्ये कोही बानेश्वर शान्तिनगरमा सशस्त्र प्रहरीका पूर्वडिआइजी ज्ञानेन्द्र राईको घर, कोही श्रीकृष्ण पौडेलको कार्गो अफिस, कोही बागबजारको संगम गेस्टहाउस, कोही श्रीकृष्णकै म्हैपीमा रहेको भाडाको कोठा र कोही गोंगबुमा राजु लामाको सहयोगमा भाडामा लिइएको सविता श्रेष्ठको घरमा बसे ।
बब्बुले काठमाडौंमा बसेका वेला माघ १६/१७ गते सई प्रकाशसँग ल्यान्डलाइन फोनबाट सम्पर्क गरे । त्यसपछि उनीहरूको भेट बाक्लै भयो । उनले जमिमबारे जानकारी दिइरहेका थिए ।



कसरी भागे हत्यारा ?
जमिमको हत्या भएलगत्तै महाराजगञ्जतिर गएजस्तो गरे पनि हत्याराहरू घुमेर लैनचौर आएका थिए । त्यतिञ्जेल समूहका सबै सदस्य भेला भइसकेका थिए । लैनचौरमा रहेको दुग्ध विकास संस्थानअगाडि भेला भएका दुईजना सुटरलाई श्रीकृष्ण पौडेलले कलंकी कटाए । पौडेलले दुवैजनालाई फरक-फरक मोटरसाइकलमा पालैपालो कलंकी पुर्‍याएका थिए । प्रहरीलाई भ्रममा पार्न अन्य सहयोगीले हत्यामा प्रयोग भएको मोटरसाइकल फुटुङ पुर्‍याएर बाँसको झ्याङमा फालिदिएका थिए । यसबीचमा सई प्रकाशले सुरक्षा अवस्थाको बारेमा जानकारी दिइरहेका थिए ।

कसरी सघाए सई प्रकाश क्षेत्रीले ?
जमिमको हत्यामा मुख्य सहयोगीको भूमिका खेल्ने प्रकाश क्षेत्री नेपाल प्रहरीका सई हुन् । असई पदबाट ०५४ सालमा नेपाल प्रहरीमा प्रवेश गरेका उनको ०६१ सालमा सईमा बढुवा भएको थियो । श्रीपुर- ८ बेलौरी कञ्चनपुरनिवासी क्षेत्री हाल ललितपुरमा बस्दै आएका छन् ।

सेती अञ्चल प्रहरी कार्यालय धनगढी दरबन्दीमा भए पनि क्षेत्रीको गत वर्ष प्रहरी प्रधान कार्यालयमा काज सरुवा भएको थियो । प्रहरी प्रधान कार्यालयमा केही समय काम गरेका उनी लगत्तै सेक्युरिटी लियाजो अफिसरमा नियुक्त भएका थिए । उनी अमेरिकन राजदूतावासको सुरक्षाका लागि खटिएका जुनियर अधिकृत हुन् ।

क्षेत्रीले कहिलेदेखि अमेरिकन दूतावासमा काम गर्न थालेका हुन् भन्नेबारे प्रहरीले केही खुलाएको छैन । हाल उनलाई म्याद थप गरी अनुसन्धानका लागि महानगरीय प्रहरी परिसर हनुमानढोकाको हिरासतमा राखिएको प्रहरीले दाबी गरे पनि महानगरीय प्रहरी आयुक्तको कार्यालयमा राखेर दिनदिनै सोधपुछ गर्ने गरिएको प्रहरी स्रोत बताउँछ ।

source:

http://www.nayapatrika.com/newsportal/permalink/11061.html

Add to: del.icio.us | Digg